LEME nútrese dos contidos das bases de datos de información xeográfica do Consello da Cultura Galega, coma o Mapa de Equipamentos Culturais, os Roteiros da Cultura Galega e o proxecto As Escolas da Emigración, ofrecendo de partida máis de 6.000 localizacións ao longo de toda Galicia. Desde teatros, auditorios ou galerías de arte ata castelos, castros ou espazos literarios.
LEME (temón, sentido) permite ao usuario facer turismo cultural a través de rutas guiadas seguindo o ronsel de destacados escritores do país, consultar espazos de celebración de eventos e mesmo explorar, anotar e compartir novos espazos culturais que o usuario considere relevantes.
LEME está programado para que terceiras entidades, sen coste algún, poidan incorporar tamén os seus espazos xeolocalizados á aplicación e crear un gran centro de recursos móbil sobre a cultura de Galicia. "Trátase de que os usuarios poidan contribuir, xunto co Consello da Cultura Galega, ao desenvolvemento e enriquecemento desta plataforma aberta e gratuíta", subliñou Manuel Gago.