08/06/2012 Baixa o PROGRAMA Poder brando e diplomacia cultural en Galicia Baixa o DOCUMENTO Conclusións

---

A gobernanza e a diplomacia no mundo internacionalizado e crecentemente interdependente deben considerar cada vez máis a importancia estratéxica da cultura e a súa influencia operativa na axenda xeral para a fixación da marca-país e para o seu positivo e diferenciado posicionamento entre as nacións. No tocante a Galicia, con importantes potencialidades culturais, necesitaríase "comunicar mellor, superar a fragmentación e crear os instrumentos adecuados para desenvolver unha "diplomacia cultural" activa, eficaz e perseverante". Esta foi unha das conclusións das xornadas "Poder brando e diplomacia cultural en Galicia", organizadas polo Consello da Cultura Galega (CCG) e o Instituto Galego de Análise e Documentación Internacional (IGADI), iniciadas onte e que hoxe concluíron na Illa de San Simón coa participación de expertos de Brasil, México, Guatemala, Cataluña e Galicia. Os debates puideron ser seguidos vía streaming a través de www.consellodacultura.org

As xornadas significaron a importancia do "poder brando" nas sociedades contemporáneas e a súa influencia na calidade democrática, no desenvolvemento das industrias culturais e na imaxe exterior. As conclusións, presentadas por Xulio Ríos, director do IGADI, destacaron o feito de que "non é posible avanzar nese triple obxectivo sen prestar atención á diplomacia cultural, cada vez máis relevante nas políticas públicas". Salientaron tamén a necesidade de "estratexias específicas coherentes e sostidas" para aproveitar as oportunidades que abre a diplomacia cultural.

Galicia ten potencialidades importantes e posibilidades para desplegar unha "diplomacia cultural activa e positiva" pero precisa "saber comunicar mellor os seus obxectivos e proxectos, superar a fragmentación existente e aproveitar e proxectar os seus recursos na súa imaxe exterior. "Para cumprir ese obxectivo Galicia necesita crear os instrumentos axeitados para desenvolver unha diplomacia cultural activa, eficaz e sostida"

DERRADEIRA SESIÓN

Polo demais, na derradeira sesión e sobre a importancia da diplomacia branda ou versátil, falou esta mañá Edgar Montiel, director da Oficina da UNESCO en Guatemala, que describiu a "diplomacia cultural" como un proxecto "altamente participativo, atento ás produccións artísticas, culturais, intelectivas e científicas da comunidade nacional cunha relación fluída e democrática cos creadores". O relator defendeu a idea dos "mediadores culturais" e o seu papel nun escenario que aposta cada vez máis pola visión holística e no que as manifestacións culturais, artísticas, educativas, científicas, tecnolóxicas e comunicacionais forman parte dun "único paquete". Esa diplomacia cultural incorporaría un enfoque estratéxico de política exterior para a era intercultural e consideraría a cultura como "un recurso para a cohesión social, o diálogo entre os pobos, a paz social e o desenvolvemento compartido" á vista da importancia da cultura como factor dinámico da economía mundial.

Pola súa parte, Alfons Martinell, director da Cátedra UNESCO "Políticas Culturais e Cooperación" e profesor titular da Universidade de Girona, no seu relatorio "Política cultural e diplomacia pública" defendeu a idea dun goberno "facilitador e non director dunha política cultural exterior, definidor de marcos e canles e non de contidos, que son cousa dos creadores". Apostou por establecer relacións de confianza e diálogo e menos pola alta dependencia de centros ou institutos como o Cervantes e cuestionou a eficacia das accións gubernamentais en solitario para crear e potenciar unha marca-país. Chamou a atención sobre a dimensión multilateral de calquera acción cultural e sobre a esixencia de colaborar coas administracións autonómic as e cos entes locais.

No acto de clausura das xornadas participou xunto co Presidente do Consello da Cultura Galega, Ramón Villares, o Secretario Xeral de Política Lingüística da Xunta de Galicia, Valentín García Gómez.

INAUGURACIÓN

A CULTURA, RECURSO ESTRATÉXICO DA POLÍTICA EXTERIOR

OS GOBERNOS LOCAIS E A PROMOCIÓN EXTERIOR DA IDENTIDADE. O CASO DA EMIGRACIÓN MEXICANA EN ESTADOS UNIDOS

A PROXECCIÓN EXTERIOR DA CULTURA GALEGA: POLÍTICAS, ACTORES, ESCENARIOS

CONCEPTOS E PRÁCTICAS DE DIPLOMACIA CULTURAL. UN RECURSO DE POLÍTICA EXTERIOR PARA LA ERA GLOBAL

imprimir enviar por correo electrÓnico