24/05/2012 Baixa o PROGRAMA Xigantes ou ananos? Celso Emilio Ferreiro e o debate sobre a emigración galega

---

A xornada “¿Xigantes ou ananos? Celso Emilio Ferreiro e o debate sobre a emigración Galega” puxo sobre a mesa a necesidade de dinamizar as relacións coa terceira xeración dos emigrantes, nomeadamente en América e darlle un novo impulso á proxección de Galicia. A sesión, organizada polo Arquivo da Emigración Galega, do Consello da Cultura Galega, e coordinada polo profesor Xosé Manoel Núñez Seixas, revisou tamén diferentes aspectos da biografía persoal e literaria de Celso Emilio Ferreiro (Celanova, 1912-Vigo, 1979) e a súa desemellante relación co mundo da emigración en Venezuela, onde en 1968 publicara “Viaxe ao país dos ananos”, logo de ser expulsado da Hermandad Gallega.

Sobre a necesidade de tender novas pontes coa terceira xeración dos emigrantes galegos en América argumentaron a xornalista e escritora, exdelegada da Xunta de Galicia en Bos Aires, María Xosé Porteiro, e o escritor e emigrante Xosé Neira Vilas, nunha mesa redonda que contou tamén coas contribucións do xornalista Anxo Lugilde e de Ildefonso de la Campa, da Secretaría Xeral de Emigración, moderados por Ramón Villares, presidente do Consello da Cultura Galega.

María Xosé Porteiro apostou por “tecer novos vencellos tendo en conta a existencia dos fíos” e abrir unha cooperación en pé de igualdade “con xentes que contínuamente miran cara a nós". Aludiu ao polémico libro de Celso Emilio Ferreiro como “un desafogo do poeta” e reclamou unha particular atención para o papel das mulleres emigrantes. “Falamos de xigantes ou ananos, pero as mulleres non entran nesas categorías pola súa invisibilidade”.

Xosé Neira Vilas referiuse asemade á necesidade de atender á xente nova da emigración galega, contribuíndo a satisfacer a súa curiosidade e o seu interese por todo o referido á “patria anterior”. Sobre Celso Emilio “un gran poeta” dixo que tiña algo de “inadaptado” e lembrou que hai xigantes e ananos a un lado e outro do Atlántico. “Non se lles podía pedir moito máis aos emigrantes, pero os feitos falan con claridade da súa preocupación pola mellora da situación de Galicia”.

Esa realidade social da emigración conforma tamén a realidade de Galicia, na expresión de Ildefonso de la Campa, da Secretaría Xeral de Emigración. ¿Xigantes oun ananos? “Son galegos”, dixo para referirse logo á reunión do Consello de Comunidades Galegas os días 28 e 29 de xuño en Compostela co obxecto de tomar o pulso á cidadanía galega no exterior.

Pola súa parte, o xornalista Anxo Lugilde falou dos dous discursos, positivo e negativo, sobre a emigración na obra de Celso Emilio e do derrubamento da súa idealización da emigración, do que pensara como "falso mito da Galicia ideal". “Os emigrantes son xigantes, ainda que entre eles hai ananos”, dixo.

A mesa redonda cerrou esta tarde unha xornada, que durante a mañá coñeceu os relatorios “Celso Emilio: unha biografía político-intelectual” (Ramón Niicolás), “A inmigración galega en Venezuela en tempos de Celso Emilio” (Raul Soutelo Vázquez), e “Revisando os ananos: a interpretación da emigración galega en Celso Emilio Ferreiro” (Xosé Manoel Núñez Seixas).

imprimir enviar por correo electrÓnico