José Luís Villacañas fala sobre “Recordar e olvidar” no ciclo “Os sentidos das culturas”

José Luís Villacañas, catedrático de Filosofía Moral e Política da Universidade de Murcia, reflexionará e debatirá sobre o tema “Recordar e olvidar”. A conferencia forma parte do ciclo “Os sentidos das culturas”, coordinado polo profesor Ramón Máiz, e celebrarase ás 17 horas na Biblioteca do Consello da Cultura Galega.

O Consello edita unha publicación que homenaxea a Xosé María Álvarez Blázquez como bibliófilo, editor e erudito

Santiago de Compostela, 13 de maio de 2008.- O Consello da Cultura Galega presentou hoxe unha publicación conmemorativa do “Día das Letras Galegas”. Trátase da edición facsímile do manuscrito autógrafo “Égloga de Belmiro e Benigno”, de Nicomedes Pastor Díaz; do facsímile dese texto impreso e editado en 1951 pola editorial Monterrey, dirixida por Xosé María Álvarez Blázquez (1915-1985), autor das “Notas para unha edición crítica”, publicadas nos “Cuadernos de Estudios Gallegos” e tamén incluídas na publicación que homenaxea, como editor, bibliófilo e erudito, á figura a quen este ano a Real Academia Galega dedica a efeméride das Letras Galegas. Continúe lendo…

Xa se poden descargar as actas de “Comunicación e Cultura en Galicia e Portugal”

No congreso, tal e como reflicten as actas, abordáronse moi diversos temas, entre eles os usos dos medios no ensino, as confluencias entre xornalismo e literatura, a actualidade das industrias culturais ou a situación do sector audiovisual. Ademais, as comunicacións presentadas permiten recoñecer as teimas dos investigadores máis novos que navegan nas augas mestas do estudo histórico, a análise sincrónica e as proxeccións futuras do hipersector da comunicación. Todas as achegas constrúen un discurso investigador plural que nos permite afondar nas relacións comunicativas entre Galicia e Portugal, as dúas beiras do mesmo río.

• Pode descargala en PDF desde a Mediateca do Consello da Cultura Galega.

“A conflictividade territorial contemporánea, vehiculada pola paisaxe, reflicte o medo á perda do sentido de lugar”, afirmou Joan Nogué

Santiago de Compostela, 9 de maio de 2008.- “A conflictividade territorial contemporánea, vehiculada a través da paisaxe, reflicte en boa medida o medo á perda do sentido do lugar”, afirmou Joan Nogué, catedrático de xeografía e director do Observatorio da Paisaxe de Cataluña, na súa intervención no foro de debate “Olladas críticas sobre a paisaxe”, que esta tarde concluiu no Consello da Cultura Galega. A segunda sesión do foro contou tamén, entre outras, coa intervención de Pierre Donadieu, agrónomo e xeógrafo e Director de Investigación da Escola Nacional Superior de Paisaxe de Versalles (Francia).

Continúe lendo…